ٿر جي ھڪ ماءُ جو بلاول ڀٽو ڏانھن کليل خط

ٿر جي هڪ مائر جو بلاول ڀٽو ڏانهن کليل خط

shahbaz khan shar

محترم بلاول صاحب اوهان اهڙي
عظيم ماء جا فرزند آهيو جنهن رڳو پنهنجو سڄو خاندان عوام جي خاطر قربان ڪري پاڻ به دنيا جي ڊريم سٽيز جهڙوڪ دبئي ۽ لنڊن جي ڪمفورٽيبل زندگي کي ڪڪ آئوٽ ڪري پاڪستان جي مظلوم عوام جي ترجمان بڻجي کين انصاف ڏيارڻ جو علم پنهنجي هٿن ۾ کنيو ۽ پنهنجي خاندان وانگر پاڻ به روايتي شهادت جي درجي تي فائز ٿي وئي . منهنجا هي مختصر لفظ ان عظيم شخصيت جي مرتبي جي لاء ناڪافي آهن ليڪن آئون ناچيز ڪٿي ٿي ان شهيد راڻي جي عقيدت بيان ڪري سگهان . مونکي ته ٿر جي اسانجي معصوم ٻارڙن جو نوحو اوهانجي اڳيان پيش ڪرڻو آهي جنهن جي لاء لفظ ماتمي آهن ته لفظن جو رنگ غم جي علامت سمجهو ويندڙ ڪاري رنگ سان ٽائيپ ڪيل آهن . آئون اوهانکي اوهانجي پارٽي جي اڇي ڪاري جي مالڪ بڻيل انهن مانگر مڇن جي اصليت ٻدائڻ چاهيان ٿي ليڪن خوف آهي انهن ته اڳ م ئي ٿر جي مائرن کي سندس ٻارڙن جي قتل جي ايف آئي آر ۾ شامل ڪيو آهي انهي ڪري ڀيانڪ ڀڻيل هن دنيا جي ستين نمبر ريگستان جون اسان روپوش مائرون ڪٿي اشتهاري ڏوهاري نه بڻجي وڃون انڪري اوهانکي پنهنجي صفائي ۾ ڪو ثبوت ته نٿيون ڏئي سگهون نه ئي اسان وٽ ڪو شاهد آهي نه ئي اسان وٽ پنهنجي معصوم گلڙن جو پوسٽ مارٽم رپورٽون آهن جيڪي اوهانجي خدمت ۾ پيش ڪريون ڇو ته هڏن جا پڃرا پڻيل انهن معصوم فرشتن جا اک کولڻ وقت ئي پوسٽ مارٽم ٿيل هئا . ها اسان وٽ دايون ٿي سگهي ٿو اسانجي ضمانت ڏين ليڪن اهي به قتل جي بڇ ڪندڙن جي ايف آئي آر ۾ شامل آهن .ڇوته انهن جو ڏوهه اهو هو هنن اڻپڙهيل داين ويم ڇو ڪرايو ؟ سائين منهنجا صحت جون سهولتون ڏيڻ ته صحت کاتي جي ذميواري آهي هاڻي جيڪڏهن ڊسپينسرين ۾ ٻدل گڏه ۽ ماهوار منٿلي تي ويل عملو نه هوندو ته ظاهر آهي ته اسان ٻن ويلن لاء محتاج مائرون ڪٿي گائناڪالاجسٽ جو خرچ توڙي سندس نيشنل ڪمپنين سان ڪيل مهانگين دوائن جو خرچ ڪٿي ٿا برداشت ڪري سگهون ؟ انصاف ته ڏسو اسان پاڻ جيڪي فريادي جو حقدار آهيون ان حڪومت تي جنهن وٽ ڊاڪٽر عاصم لکين روپيه فيس وٺندڙ وڪيل ته آهي ليڪن اسان مسڪينن جي علاج لاء ڊاڪٽر ناهن ؟ خير آئون هاڻي اوهانکي پنهنجي ضمانت لاء پرنٽ ۽ اليڪٽرانڪ ميڊيا ڏيان ٿي ليڪن انهن جي رپورٽن کي به اوهانجي سائين سرڪار قاصر بڻيل آهي اسانجي معصوم ٻارڙن جي موت جو خبرون هلائڻ تي ٿر سان تعلق رکندڙ هڪ صوبائي وزير ايترو اڳتي نڪري ويو معصوم فرشتن جي موت جي سنجيده خبرون هلائندڙ ميڊيا کي ڪاروبار جو رنگ ڏئي ڇڏيو . سائين منهنجا ان ميڊيا جو ڏوه صرف ايترو آهي انهن بي پهچ مسڪينن جون خالي ٿيندڙ جهولين کي فوڪس ڪيو هو . انهن ته لاش کڻائڻ جيترا پئسا نه هجڻ ته اوهانجي سرڪار کي سجاڳ ڪيو هو ته اوهانجي سرڪار جي وزيرن کان وٺي ڪامورن تائين جي فيميلن جي زڪام جو علاج جيڪڏهن برطانيا جي اسپتالن مان ٿي سگهي ٿو ته پو۽ هنن مسڪينن جو علاج ٿر جي اسپتالن مان ڇو نٿو ٿي سگهي ؟ بلاول صاحب آئون مسڪين اوهانجي سنڌ سرڪار موجب اهڙي معصوم ٻارڙي جي قتل ۾ ملوث آهيان جيڪو منهنجو پنهنجو رت آهي منهنجو پنهنجو لخت جگر آهي جنهن لاء 9 مهينا مون اوجاڳا برداشت ڪيا هئا اڄ اوهانجي حڪومت توڙي ٿر جي نام نهاد اين جي اوز جي لاپرواهي سبب سڄي زندگي جو غم پنهنجي اکين ۾ رکيو ويٺي هئس ته متان وري مونکي منهنجي ٻچڙي جي قاتل ڪوٺڻ ڪٿي جو انصاف آهي ؟ ها منهنجو ڏوهه اهو آهي ته آئون ان بدنصيب ٻارڙي جي ماء آهيان جنهن کي صرف وزيرن جي ڊپ مان اسپتال مان بيدخل ڪيو ويو هو متان انهن صاحبن کي منهنجي ٻارڙي جي وجود جو پتو پئجي وڃي جيڪو سندن جي حڪومت جي بدنامي جو ذريعو بڻجي متان ان ورڊ جي رجسٽر ۾ هن بدنصيب جو نالو لکجي وڃي . روز الائي ڪيترائي اسانجا ٻارڙا مٺي سول اسپتال مان ريفر ڪيا پيا وڃن متان انگن اکرن ۾ اهي شامل ٿي وڃن . بلاول صاحب حضرت عمر فاروق فرمايو ته بک جي ڪري جيڪڏهن ڪو ڪتو فرات ندي تي مري ويو آهي ان لاء آئون جوابدار آهيان ليڪن هي ڪهڙو اسلامي جهموريه پاڪستان آهي جتي اسانجي ٿڃ خوراڪ جي ڪمي جي ڪري سڪي ويون آهن جتي ايب نارمل ٻارڙن جو جنم ٿئي ٿو جن ۾ خوراڪ جي گهٽٽائي آهي . سائين منهنجا آئون مسڪين بي پهچ ماء بس درد بيان ڪيو آهي گستاخي معاف ڪجو .
فقط ٿر جي هڪ ماء

فيس بڪ مان پيدا ٿيل نوجوانن جي سياست جو انقلاب.

شھباز خان شر

فيس بڪ مان پيدا ٿيل نوجوانن جي سياست جو انقلاب………!!!

پاڪستان جي سياست ۾ جتي نوجوانن کي ڳالهڻ جو يا انن جي رائين جي ڪا احميت ڪون هوئي. انن جي ڪو به ڳالهه ٻڌڻ لاءِ تيار ڪون هو سياست ۾ وڏي عمر جي ماڻهن کي ۽ انن جي تجربن کي ترجي ڏني ويندي هوئي ميڊيا جي دنيا ۾ نوجوان نسل جو ڪو نشان ڪون هو. پر فيس بڪ نوجوانن کي سياست بابت ڳالهڻ جي کولي آزادي ڏني آهي ڏينهون ڏينهن جزبات هڪ ٻئي سان ملي رهيا آهن ۽ ڄاڻ سوچ هڪ ٿي رهي آهي فيس بڪ تي پيدا ٿيندڙ انقلاب عرب ملڪن وانگر يه ان کان به وڌيڪ طاقت بڻجي پيو. پر حڪمران پنهنجي مضبوطي ڏيکارڻ لاءِ پنهنجي طاقت جو استعمال ڪري رهيا آهن جنهن جا نتيجا ايترا ته خترناڪ نڪرندا جو پاڪستان جي ڏاهن اندازو به ڪون لڳايو هوندو. پر اسان ان مان اهيو اندازو ضرور لڳايو آهي ته پاڪستان جي حفاظت ڪرڻ وارو ڪو به ڪون آهي سرحدو ويران ۽ بند ڪمزور آهن جيڪي فيس بڪ مان پيدا ٿيندڙ سيلاب کي ڪون روڪي سگهندا.

سياسي حالتن جو رخ ڪيڏانھن وڃي رھيو آھي.تفصيل جي لاء ڪلڪ ڪريو

شھباز خان شر

سياسي حالتن جو رخ ڪيڏانهن وڃي رهيو آهي؟

پاناما ليڪس وارو اِشو رڳو پاڻ وارن حڪمرانن لاءِ ئي نه پر عالمي سطح تي ڪيترن ئي ملڪن جي حڪمرانن لاءِ مٿي جو سور بڻجي ويو آهي ۽ اتي حڪمرانن کان استعيفيٰ وٺڻ جا مطالبا ٿي رهيا آهن. اهڙي قسم جو مطالبو پاڻ وارن حڪمرانن کان به ٿي رهيو آهي. اهو مطالبو پهريان عمران خان جي قوم کي خطاب دوران سامهون آيو، ان بعد ٻيا به ميدان تي لهي پيا. هاڻي ته جماعت اسلامي جو سربراهه سراج الحق به کليل لفظن ۾ وزيراعظم کان استعيفيٰ جو مطالبو ڪري رهيو آهي. جيتوڻيڪ پاڪستان پيپلز پارٽي هينئر تائين کليل لفظن ۾ وزيراعظم کان استعيفيٰ جو مطالبو ناهي ڪيو، پر جهڙي نموني ميل ملاقاتن ۽ رابطن، واسطن جو سلسلو جڙي پيو آهي، انهيءَ کي ڏسي ائين محسوس ٿي رهيو آهي ممڪن آهي اڳتي هلي پيپلز پارٽي به ان مطالبي ۾ شامل ٿي وڃي. تازو تحريڪِ انصاف جي اڳواڻ شاهه محمود قريشي، اعتزاز احسن ۽ سيد خورشيد احمد شاهه سان جيڪا خوشگوار ماحول ۾ ملاقات ڪئي آهي ۽ پي ٽي آءِ جي نواز ليگ خلاف تحريڪ ۾ شامل ٿيڻ جي دعوت ڏني آهي، اها ضرور پنهنجو اثر ڇڏيندي. سياسي مبصر ته اهو به چئي رهيا آهن ته ميان صاحب جو جيڪو لنڊن وارو هي اوچتو دؤرو آهي، ان جو مقصد ئي زرداري صاحب کي راضي ڪرڻ آهي، پر ڇا هو اڳ جيان ”جمهوريت جي وسيع مفادن خاطر“ بنا ڪنهن شرط جي راضي ٿي ويندو يا هن ڀيري ٻيو رستو اختيار ڪندو؟ سڀني کي ان شيءِ جو انتظار آهي. اعتزاز احسن ته کليل لفظن ۾ چئي رهيو آهي ته وزيراعظم لنڊن ۾ آصف زرداري جي درٻار ۾ حاضري ڀرڻ ويو آهي، جنهن کان نواز ليگ انڪار ڪري رهي آهي پر پيپلز پارٽي جيڪڏهن هن ڀيري نواز ليگ جو ساٿ ڏنو ته اها ختم ٿي ويندي. ساڳي ڳالهه ميان رضا رباني به ڪري رهيو آهي، جنهن جو چوڻ آهي ته هن وقت نواز ليگ جو ساٿ نه ڏنو وڃي، ٻي صورت ۾ پيپلز پارٽي جو نالو نشان به نه رهندو. هاڻي ڏسڻو اهو آهي ته پيپلز پارٽي جو چيئرمين ۽ شريڪ چيئرمين هن معاملي کي ڪيئن ڏسن ٿا ۽ ڪهڙي حڪمت عملي جوڙين ٿا؟

ملڪ جو سياسي ميدان هڪ ڀيرو ٻيهر گرم نظر اچي رهيو آهي. اسلام آباد ۾ عمران خان جي ڊگهي ڌرڻي وقت جيڪو عجيب ۽ غريب تبصرن ۽ تجزين جو سلسلو شروع ٿيو هو، ڪجهه عرصي جي ڪاما کان پوءِ اهو وري شروع ٿي ويو آهي. جيئن چوندا آهن ته ”رٺي اڳ ۾ ئي ويٺي هئي، ويتر آيس پيڪن جو ماڻهو“ سو هتي به پاناما ليڪس اهو ساڳيو ئي ڪم ڪري ڏيکاريو آهي. تحريڪ انصاف سميت جيڪي مخالف ڌريون موقعي جي تلاش ۾ هيون انهن کي هڪڙو ڀرپور موقعو مليو آهي ۽ اهي انهيءَ کي وڃائڻ نٿيون چاهين. هن ڀيري محسوس ائين ٿي رهيو آهي ته نواز ليگ خلاف جيڪو ميدان سجندو ان ۾ اڪيلي تحريڪ انصاف بيٺل نه هوندي، پر انهيءَ سان گڏ پيپلز پارٽي، ق ليگ، جماعت اسلامي سميت مختلف پارٽيون گڏ بيهنديون. جيتوڻيڪ وزيراعظم قوم کي خطاب ان اميد سان ڪيو ته هي معاملو آيو ويو ٿي ويندو ۽ ڳالهه بي اثر ٿي ويندي، پر ائين نه ٿيو. مٿان جيڪو عمران خان وارو نجي چئنلن تي قوم کي خطاب آيو ان رهي ڪسر به پوري ڪري ڇڏي. اها ڳالهه نواز ليگ جي ليڊرشپ به مڃي ٿي ته عمران خان واري اسلام آبادي ڌرڻي دوران جيڪڏهن پيپلز پارٽي سندس ساٿ نه ڏي ها ته هن مسئلي مان جان ڇڏائڻ مشڪل هئي، پر هن ڀيري معاملو مختلف نظر اچي رهيو آهي. نواز حڪومت طرفان گذريل ڪجهه عرصي کان پيپلز پارٽي کي اندران ئي اندران جهڙي نموني ٽف ٽائيم ڏيڻ جي ڪوشش ٿيندي رهي آهي، هاڻي جڏهن موقعو آيو آهي ته محسوس ائين ٿي رهيو آهي ته پيپلز پارٽي به رهيل سمورا حساب برابر ڪرڻ چاهي ٿي. ان جو اندازو ان ميڊيائي خبر مان لڳائي سگهجي ٿو ته ميان صاحب لنڊن واري دؤري دوران آصف علي زرداري سان ملڻ جي خواهش ڏيکاري، جنهن تي زرداري صاحب انڪار ڪري ڇڏيو. ان حوالي سان مختلف خبرون آهن، پل پل ۾ صورتحال تبديل ٿي رهي آهي. گڙٻڙ وڏي آهي ۽ اها گڙٻڙ رڳو پاناما ليڪس جي ڪري به نه آهي، پر خود پارٽين جي پنهنجي رڌڻي ۾ به رولڙو پيل آهي. هڪ پاسي تحريڪِ انصاف اندر ڪيترائي گروپ ٺهي وڃڻ جون ڳالهيون ٻڌجي رهيون آهن ته ٻئي طرف نواز ليگ جي صفن ۾ به ڪيترائي ڏار پوڻ جون خبرون آهن. چيو پيو وڃي ته تحريڪِ انصاف ۾ شاهه محمود قريشي، جهانگير ترين ۽ چوڌري سرور ۾ جيڪي اختلاف ڍڪيل هئا، اهي هاڻي آهستي آهستي ظاهر ٿي رهيا آهن. ان جو اندازو شاهه محمود قريشي جي ان بيان مان لڳائي سگهجي ٿو ته جهانگير ترين ۽ چوڌري سرور کان ٽڪيٽ وٺڻي پئي ته سياست ڇڏي ڏيندس. ٻئي طرف چوڌري سرور جو چوڻ آهي ته بني گالا وڃي سچ ڳالهايان ٿو، تنهن ڪري ڪجهه ماڻهو پسند نٿا ڪن. بهرحال تحريڪِ انصاف جا هي اندروني اختلاف ڪٿي وڃي دنگ ڪن ٿا، اهو اڳتي هلي ڏسڻو آهي. ساڳي طرح نواز ليگ اندر گهڻ طرفا اختلاف سامهون اچي رهيا آهن. هڪڙو اختلاف ته خود شريف فيملي اندر آهي، جنهن کي ولي عهد جي مقرري جي جنگ چيو پيو وڃي ۽ ٻڌايو پيو وڃي ته ننڍو ڀاءُ پاڻ وڏي ڀاءُ لاءِ مسئلا پيدا ڪري رهيو آهي. ٻئي طرف چوڌري نثار بابت پڻ ڪيتريون ئي خبرون، تبصرا ۽ تجزيا ٻڌجي رهيا آهن ۽ چيو پيو وڃي ته اهو خود نواز ليگ لاءِ مسئلا پيدا ڪرڻ جي مهم تي لٿل آهي. ان سلسلي ۾ اعتزاز احسن ۽ سيد خورشيد احمد شاهه ته ڪيتريون ئي ڳالهيون ڪري رهيا آهن. بهرحال هي اختلاف ڪهڙو رنگ اختيار ڪن ٿا ۽ انهن جا نتيجا ڪهڙا سامهون اچن ٿا، اهو وقت ثابت ڪندو.

جيڪڏهن ڏٺو وڃي ته پاناما ليڪس وارو معاملو ايترو هلڪو ۽ معمولي به نه آهي جيئن نواز ليگ جا وزير ۽ مشير محسوس ڪرائي رهيا آهن. هي انتهائي اهم اِشو آهي، جنهن عالمي سطح تي ٻڙڌڪ مچائي ڇڏيو آهي. هن ۾ باقاعده ثبوتن سان شيون ظاهر ڪيون ويون آهن، جنهن ۾ انڪار ڪرڻ جي ڪا گنجائش ئي نه آهي. عوامي پريشر ۾ اچي آئيس لينڊ ۽ هڪ اڌ ٻين ملڪن جي سربراهن استعيفائون ڏئي ڇڏيون آهن ۽ اهو پريشر جيئن پوءِ تيئن وڌي رهيو آهي. تحريڪ انصاف جنهن پاناما ليڪس جي جاچ نه ڪرڻ تي رائيونڊ جو گهيراءُ ڪرڻ جو اعلان ڪيو آهي، ان جو نواز ليگ حڪومت جي صحت تي خبر ناهي ڪهڙو اثر پيو آهي يا پوندو، پر جيڪڏهن تحريڪ انصاف سان پيپلز پارٽي، جماعت اسلامي، ق ليگ سميت سموريون مخالف ڌر جون پارٽيون گڏجي وڃن ٿيون ۽ اهڙو ڪو گڏيل ڌرڻو لڳي ٿو ته ان جي پريشر کان نواز ليگ پاڻ کي ڪنهن به صورت ۾ بچائي نه سگهندي. اهو ئي سبب آهي جو اهڙي صورتحال کي روڪڻ لاءِ نواز سرڪار جي اهم عهديدارن هٿ پير هلائڻ شروع ڪري ڇڏيو آهي ۽ اهي ٻين پارٽين سوڌو تحريڪ انصاف کي به راضي ڪرڻ جي چڪر ۾ آهن. جيڪڏهن اها راضي نٿي ٿئي ته کيس اڪيلو ڪرڻ جي ڪوشش ۾ آهن، پر هن ڀيري مخالف ڌر جو موڊ ڪجهه مختلف نظر اچي رهيو آهي، جنهن ۾ ڪافي غلطيون نواز ليگ سرڪار جون ئي آهن. اسلام آباد واري ڌرڻي دوران هي جيتري پريشان هئي ۽ جهڙي نموني مخالف ڌر جي پارٽين کان سهڪار گهري رهي هئي، ڌرڻو ختم ٿيڻ کان پوءِ اها انگوڇو ڇنڊي وري شينهن ٿي بيٺي، نه ته ٿيڻ ائين کپي ها ته جن پارٽين به سندس ساٿ ڏنو، انهن سان فرينڊشپ وارو ورتاءُ قائم رکيون اچي ها ۽ مختلف معاملن ۾ انهن کي پاڻ سان گڏ گڏ کڻي هلي ها، پر اسان سڀني ڏٺو ته ائين نه ٿيو. نواز ليگ هڪ ڀيرو ٻيهر ماضي واريون ساڳيون روايتون ورجائڻ شروع ڪيون ۽ ون مين شو ڏيکارڻ شروع ڪيو. پاناما ليڪس ته هڪ بهانو ٿي سامهون آيو آهي، پر مخالف ڌر جون پارٽيون پهريان کان ئي نواز ليگ تي ناراض ويٺل هيون. هينئر به موقعو ناهي ويو، جيڪڏهن نواز ليگ سنجيدگيءَ سان هن معاملي کي هينڊل ڪري ٿي ۽ مخالف ڌريون پاناما ليڪس جي جاچ جو جيڪو طريقيڪار چئي رهيون آهن، ان تي عمل ڪيو ويو ۽ شفاف جاچ سامهون آئي ته منهنجي خيال ۾ هي معاملو حل ٿي ويندو.

حقيقت ۾ هن وقت نواز ليگ هڪ وڏي آزمائش مان گذري رهي آهي، کيس نهايت ئي احتياط کان ڪم وٺڻو پوندو. ان سلسلي ۾ پهريان ته پنهنجي انهن گهڻ ڳالهائو وزيرن کي ڪنٽرول ۾ آڻڻو پوندو، جيڪي ٻرنديءَ تي تيل جو ڪم ڪري رهيا آهن.  ان بعد سمورين مخالف ڌر جي پارٽين کي اعتماد ۾ وٺڻو پوندو ۽ پاناما ليڪس سميت جيڪي به اِشو آهن، انهن تي سنجيدگيءَ سان ڳالهه ٻولهه ڪرڻي پوندي ۽ جاچ جو يقين ڏيارڻو پوندو. ماضي ۾ ٻه ڀيرا نواز ليگ حڪومت جي وقت کان اڳ ۾ وڃڻ پٺيان جيڪي ڪارڻ هئا، انهن ۾ هڪڙو ڪارڻ مخالف ڌرين جي ڳالهه کي اهميت نه ڏيڻ به هو. گهٽ ۾ گهٽ هاڻي اهڙي تجربي کان پرهيز ڪئي وڃي. ان سان گڏوگڏ مخالف ڌر جي پارٽين کي به معاملن کي ان انتها تي نه وٺي وڃڻ گهرجي جو هڪ ڀيرو ٻيهر جمهوريت جي تڏا ويڙهه ٿي وڃي. جيڪڏهن وزيراعظم سميت ٻئي ڪنهن حڪومتي عهديدار مٿان ڪا غلط ڪاري ثابت ٿئي ٿي ته ان جي سزا پوري سسٽم کي نه ملڻ گهرجي. وڏي محنت ۽ وڏين قربانين کان پوءِ جڏهن مس مس هڪڙو سسٽم جڙيو آهي، ته انهيءَ سسٽم کي تباهه نه ڪرڻ گهرجي. هڪ حڪومت پنهنجو پنج ساله مدو پورو ڪري چڪي آهي، هاڻي ٻي حڪومت کي به اهو مدو پورو ڪرڻ جو موقعو ملڻ گهرجي. جيڪڏهن ٽي چار حڪومتون ائين پنهنجو مدو پورو ڪرڻ ۾ ڪامياب ٿي ويون ته مان سمجهان ٿو ته جمهوريت جون پاڙون مضبوط ٿي وينديون ۽ پوءِ ڪنهن کي به جمهوري سسٽم جو تختو اونڌو ڪرڻ جو جواز نه ملندو. پر جيڪڏهن اهو ساڳيو پراڻو انداز اختيار ڪيو ويو ته ان سان سسٽم وري انهيءَ ساڳي پراڻي پوزيشن تي هليو ويندو، جنهن ۾ ڪنهن به حڪومت کي ٻن ۽ اڍائي سالن کان وڌيڪ حڪومت ڪرڻ جو موقعو نه پئي مليو.

سنڌھ پوليس مان سياسي مداخلت ختم ٿيڻ گھرجي……!!!

شھباز خان شر

سنڌ پوليس مان سياسي مداخلت ختم ٿيڻ گهرجي

رات جو وڳڙو هو، پوليس اٽالا هڪ هوٽل تي اچي بيٺا، بينچ تي ستل هڪ همراهه کي اٿاريو ويو ۽ پڇيو ويو ته هتي ڇو ستو پيو آهين؟ هن وراڻيو سائين تر ۾ چوري چڪاري جو آزار آهي، تنهن ڪري رکوالي ڪرڻ لاءِ هتي ستو پيو آهيان. هن کي پوليس ورندي ڏني ته گھر وڃي آرام سان سمهه! تنهنجي چوري ٿئي ته مان ڀري ڏيندس، اهي ۽ ٻيا سوين قصا مشهور ٿيا. چون ٿا ته هڪ دفعي هو پاڻ پوليس ٿاڻي تي هڪ ڳوٺاڻي جو روپ ڪري ويو ۽ ٿاڻي جي صوبيدار جو پڇيو، ٻڌايو ويو ته صاحب ستو پيو آهي، هن ٻهروپي چيو ته مون کي صوبيدار ۾ ڪم آهي، ان سان ضروري ملڻو آهي، تنهن تي جمعدار ۽ سپاهين هن کي ڌٻ ڪڍي ته صاحب تنهنجو نوڪر آهي جو تنهنجي مرضي سان اٿندو. بهرحال هن ڳوٺاڻي اڌ ڪلاڪ انتظار ڪيو ۽ صاحب سان ملڻ جو چوندو رهيو. گھڻي دير بعد هن پنهنجو پٽڪو لاٿو ۽ پوليس عملي کي پنهنجو اصلي چهرو ڏيکاريو، سڀني سيليوٽ ڪيو، صوبيدار کي فورن گھرايو ويو. هو ويس مٽائي ڪڏهن کير وارو ته ڪڏهن ڪهڙو روپ ۽ ٻهروپ ڌاري ويندو هو. منشيات جي اڏي تي موالين جهڙا حال ڪري منشيات فروشن کي گرفتار ڪندو هو. اهي قصا ۽ ڪهاڻيون آهن اي ڊي خواجه جو آهن، جيڪو اڳ شڪارپور جو ايس ايس پي ۽ موجوده آءِ جي پوليس آهي.

اي ڊي خواجه ايماندار، فرض شناس، بردبار ۽ برجستو پوليس آفيسر آهي، هر ڳالهه تي سوچ ويچار ڪري هلندو هو، نرم گفتار، بافضيلت ۽ ڀلو آفيسر ٿي گذريو آهي، ڪيئي پوليس آفيسر شڪارپور ۾ رهيا آهن پر هن جهڙو ايس پي ٻيو ڪونه ڏٺو. عوام ۽ پوليس جي عملي جي ڳالهه ٻڌندو ته ان جي جاچ ڪرائيندو ته سچ ڇا آهي ۽ ڪوڙ ڇا آهي. حقيقت معلوم ڪندو، تنهن کان پوءِ قدم کڻندو. هن جي اچڻ بعد ڀوتارن، ڏوهارين ۽ راشي پوليس آفيسرن ۾ ٽاڪوڙو مچي ويو هو. هو ڪنهن جي به گھر نه ويندو هو ۽ نه وري ڪنهن جي سفارش ٻڌندو هو، پر ڪنهن سان بيواجبي به ڪونه ڪندو هو. هو سياڻو ۽ دلير پوليس آفيسر هو.

پوليس اداري جي ڪارڪردگي تي جيڪو بحث ۽ چوٻول متل آهي، تنهن کي ٻڌي ڪا حيراني ۽ پريشاني نٿي ٿئي ڇاڪاڻ ته جهڙي نموني ٿاڻا وڪامندا آهن، تنهن جي باري ۾ سڀڪو ڄاڻي ٿو ۽ ٿاڻي جو صوبيدار به فخر سان چوندو آهي ته هيترا لک ڀري ٿاڻيدار مقرر ٿيو آهيان، سو اهي پئسا ته وصول ڪرڻا آهن ۽ هو اعليٰ عملدارن تائين منٿلي ڏئي ٿو. ضياءُ الحق جي دور کان وٺي ڄام صادق ۽ ايم ڪيو ايم ۽ ويندي آصف علي زرداري تائين پوليس کي سياستدانن، وڏيرن ۽ بااثر شخصيتن جي تابع بنايو ويو آهي. سنڌ پوليس تي جيڪا تنقيد ڪئي وڃي ٿي، اها جائز تنقيد آهي، ان ۾ ڪوبه وڌاءُ ناهي ته موجوده سنڌ صوبي جي سرڪار ۽ اڳ واري عرصي ۾ ايم ڪيو ايم جي اتحادي سرڪار ۾ ٻنهي پارٽين پوليس کان جيڪي ڪم ڪرايا، اهي انتهائي ڪريل هئا. ڏوهارين ۽ قتل جي ڪيسن ۾ سوين قاتل آزاد ٿي ويا.  اڳوڻي آءِ جي غلام حيدر جمالي تي جيڪي الزام آهن، جن جي انڪواري موجوده آءِ جي ڪئي هئي، تنهن ۾ جيڪي سنگين گهوٻيون شامل آهن، تن جي نشاندهي ڪئي وئي ۽ آخر رپورٽ سپريم ڪورٽ ۾ ڏني وئي. پ پ ۽ ايم ڪيو ايم جو بنيادي مقصد هو ته پوليس کي پنهنجو ڪمدار بنائي رکجي، ذاتي خدمت ۽ نوڪري چاڪري لاءِ پوليس تي داٻو رکيو وڃي ۽ سياست ۽ اعليٰ منصب کي ڍال طور استعمال ڪري پوليس کان ڪم ڪڍجي. ڏوهه ۽ سياست جي ڳٺ جوڙ جي ڪري سنڌ پوليس بدنام ٿي آهي. پر ان ۾ سنڌ پوليس جي اداري کي گھڻو ڏوهي قرار نٿو ڏئي سگھجي، ان ڏوهه جا ڏوهاري فقط حڪمران آهن. ان جوسبب حڪمرانن ۽ ان جي مڪاني اڳواڻن ۽ ڀوتارن جو آهي، جن کان پوليس کي غلط پنهنجي مفاد لاءِ هدايتون ملنديون رهن ٿيون ۽ جيڪو وڏيرن ۽ سياستدانن جي حڪم جي پيروي نٿو ڪري تنهن کي بدلي يا سائيڊ ڪريو ڇڏين ۽ اهو پوليس عملدار ٿاٻا کائيندو وتي ٿو، ڪي وري سياستدانن ۽ وڏيرن جا ڪمدار بنجي ڊيوٽي ۽ خدمت ۾ پيش پيش رهندي عوام آزارڻ ۾ پورا رهن ٿا. اهڙن سياستدانن ۽ عملدارن جي جهجهائي آهي. فضيلا سرڪي جو مثال وٺو، هڪ ڇوڪري ٻالڪڻ ۾ اغوا ٿي وئي ۽ اها جوان به ٿي وئي ۽ اڃا تائين بازياب ٿي نه سگھي آهي. اها ڪوتاهي هن اڏوهي کاڌل نظام جي آهي، سياستدانن ۽ حڪمرانن جي نالائقي آهي، پر پوليس ان ڏوهه ۾ سڀ کان وڌيڪ شامل آهي، جو اڃا تائين اهو پتو نه لڳائي سگھي آهي ته هو ڪٿي آهي، جيئري به اهي يا مري وئي! سوال آهي ته ڇا پوليس سسٽم ۾ سڌارو ايندو؟ نئون آءِ جي ان سسٽم ۾ بهتري آڻي سگھندو؟ اي ڊي خواجه جي جيڪا ساک پت آهي، ديانت، صداقت ۽ عقل فهمي جو ادراڪ اٿس ۽ جيڪو اميد ۽ آسرو آهي ، تنهن ڪري چئي سگھجي ٿو ته ٿورو گھڻو ڦيرو ضرور ايندو پر جلدي ۽ ايترو آساني سان اچي، اهو مشڪل آهي، پر هي ڪجهه وقت ۾ پوليس ۾ سڌارا آڻي سگھي ٿو.

”سياسي ڀرتي“ هڪ اهم سبب آهي، جنهن جي ڪري ڌاڙيل، ڏوهاري ۽ گنهگار پوليس جي وردي ۾ سماج لاءِ ٻٽو عذاب بڻجي پئي ٿو، اهو آهي اسان جي سسٽم جو ماڻ ۽ ماپو، جنهن مان اوهان اندازو لڳايو ته اهي ڪهڙي نموني سان ورتاءُ ڪندا آهن. ايم ڪيو ايم جا پوليس ۾ ڀرتي ٿيل ۽ وڏيرن جا ڀرتي ٿيل جيڪي ڏوهاري هئا، تن پوليس کاتي کي بدنام ڪري ڇڏيو آهي. ايئن به ناهي ته جيڪي به سياسي ڀرتيون ٿيون آهن، اهي سڀ جو سڀ خراب هجن پر جهڙي نموني پوليس ۽ سياست جو چرخو آهي، تنهن ڪري ”کاريءَ ۾ هڪ مڇي جي ڪري سڀ مڇيون خراب“ ٿيو وڃن. جڏهن پوليس جي خراب عملداري جو ذڪر ڪجي ٿو ته اتي سياستدانن ۽ زرداري جي اڳوڻي وفاقي ۽ موجوده سنڌ صوبي جي خراب حڪمراني جو ذڪر گھڻو اچي ٿو. جڏهن ته الطاف ازم جي ڪري پوليس کاتو يرغمال هو. ڄام صادق جي دور ۾ ايم ڪيو ايم سنڌ جي مالڪ هئي ۽ جنهن نموني ان سنڌ جي تباهي ڪئي، قتلغاري ڪئي ۽ اڻ پورا ڪيس ٺاهي ڏوهارين کي فائدو ڏنو ۽ هن وقت به سياستدانن جي چوڻ تي ٻڌ ڇوڙ جاري آهي، تنهن کي جيڪڏهن موجوده آءِ جي ٻنجو ڏئي ٿو ته اهو وڏو ڪارنامو ليکبو. اي ڊي خواجه پنهنجي ترجيح ٻڌائي آهي، ڏسڻو اهو آهي ته هو ان تي ڪيترو ڪاربند رهي ٿو. 2002ع جي پوليس آرڊر مطابق صوبائي حڪومت، صوبائي پوليس آفيسر جي مشاورت سان ڪٿي به پوسٽنگ ڪري سگھي ٿي. صوبي جي پوليس آفيسر جنهن کي انسپيڪٽر جنرل آف پوليس (آءِ جي) سڏجي ٿو، تنهن جي صلاح مشوري ڪرڻ لازمي هوندو ۽ پوءِ ئي ڪنهن به پوليس آفيسر ايس ايس پي، ايس پي يا ٻين جي بدلي ۽ پوسٽنگ ٿي سگھي ٿي ۽ هو پنهنجو مدو جيڪو ٽي سال آهي، اهو پورو ڪندو. جيڪڏهن ان معاملي تي عمل ڪيو وڃي ته پوليس ۾ سڌاري جي گنجائش گھڻي گھڻي موجود آهي، جيڪڏهن ضلعي جو ايس ايس پي ايماندار آهي ته ضلعي جي صورتحال به ڪنٽرول ۾ رهندي ۽ موجوده آءِ جي هوندي پوليس ۾ بهتري جي اميد ڪري سگھجي ٿي، اهو به چئي سگھجي ٿو ته ”سياسي مداخلت“ ختم ٿي ويندي.